築地真係要搬走？把握最後機會！場內場外7大食店
睇到呢道，或者你已經有幾個疑團，「乜原來築地有分場外、場內㗎？」、「場內場外有乜分別阿？」、「幾時先搬同搬去邊道阿？」、又或者「其實築地市場有乜好食？」等等等等……唔緊要！而家即刻為你解開種種疑團！
疑團1：「築地市場幾時搬走？搬去邊？」
經日本傳媒及官方消息報道，築地市場嘅「場內」區域將於2016年11月3日起搬遷到東京江東區豐洲6丁目5、7街區及一部分的6街區，暫定11月7日正式對外營運。
而「場外」區域亦將繼續留喺築地並進行翻新同作稍微地點調整做「築地漁河岸」，預計於2016年秋天全新開幕。
疑團2：「搬去豐洲？咩地方嚟㗎？」
豐州現主要為民居，並唔係熱門旅遊區，而近年有開始優化交通網絡同商業設施，而家最多遊人去豐州嘅景點就係LaLaport Outlet啦！
前往豐州非常方便，由新宿站沿鐵路去豐州約35分鐘，可於東京地下鐵有樂町線嘅「豐洲」站或於東京臨海新交通區線嘅總站落車就到啦！（按我顯示豐州地圖）
疑團3：「築地場外與場內有乜分別？」
有分別！築地市場主要分為「場內」及「場外」兩大範圍。
「築地場內」簡介：
本身嘅築地市場嘅別稱就係「場內」，而主要對象為批發買手，「場內」亦有分為三大區，分別為「水產市場」、「漁獲橫丁」以及「蔬果市場」。
「場內 – 水產市場」：
擠滿大大小小嘅水產店，專業買手們會係度大手入貨，喺香港嘅日本餐廳見到嘅「產地直送」，相信大部分都係喺呢道直送到港！作為批發區，大部分都逐公斤或逐箱起跳，一般遊人可能真係得睇字！不過，值得一到嘅地方係，呢度凌晨4點就會開始舉辦鮪拍賣，想感受最地道嘅日本漁業氣氛，真係要到此一遊！之不過，大家需注意！呢道並非自由參觀，由2010年5月起，遊人必須於當日親自登記排號碼，而每日限量120人可入場架咋，所以，想睇好可能要凌晨起排隊呢！
「場內 – 蔬果市場」：
呢度一定係素食者嘅天堂，有大量喺香港都仲未見過嘅「日本產地」嘅批發蔬果，就算買唔到返嚟，就咁睇個人都好似fresh 咗！
「場內 – 漁獲橫丁」：
呢道可謂「場內」嘅美食街，聚集39間知名食店！唔少食家都凌晨起就去「漁獲橫丁」搵心水食店覓食，唔少知名食店仲要一排就排幾個鐘先有得食。
場內食店1： 爭崩頭「師傅發辦」壽司店！壽司大
「壽司大」被食容形容為能感動人心嘅壽司店，其「師傅發辦」嘅壽司套餐吸引唔少來自世界各地嘅遊人，每到築地門口例必一條長龍！唔少食客仲凌晨兩、三點開始排隊，名氣迫人！
壽司大
地址：築地市場内 6号館（顯示地圖）
營業時間：5:00 am－4:00pm
場內食店2. 與壽司大叮噹馬頭的壽司店！大和壽司
講到爭崩頭嘅壽司店，同壽司大叮噹馬頭嘅一定係大和壽司！同樣以「師傅發辦」為主打，唔少食家都大讚！
大和壽司
地址：築地市場内 6号館（顯示地圖）
營業時間：5:30 am－1:30 pm
場內食店3. 炸海鮮拚盤！叉燒雙蛋飯！とんかつ八千代
唔食壽司仲有乜食？呢間炸物店同樣大排長龍！唔少食家專誠嚟食佢嘅炸海鮮拚盤同叉燒雙蛋飯。見到咁多人喺門口排隊，寧棄刺身飯都要食佢哋嘅料理，就知做得有幾出色！想感受築地不一樣嘅料理，不妨去試吓！
とんかつ 八千代 （やちよ）
地址：築地市場内 6号館（顯示地圖）
營業時間：5:00 am－1:00pm
場內食店4. 一定要黎食！大定玉子燒
築地除咗壽司，仲有唔少人鍾意嚟食玉子燒，而大定玉子燒大家都一定聽過啦！原來大定玉子燒有差唔多80年歷史，仲要啲玉子燒係新鮮出爐，所以食玉子燒一定要黎食呢間呀！
大定本店
地址：東京都中央区築地4-13-11 （顯示地圖）
營業時間：4:00 am－3:00 pm
大定市場内支店
地址：魚がし横丁7号館（顯示地圖）
營業時間：4:00 am－3:00 pm
「築地場外」簡介：
鄰近築地市場嘅商店街就係「場外」範圍，以招待觀光客同當地上班族為主，呢道嘅餐廳種類比「場內」可謂多元化！水產餐廳、和食店、洋食店、拉麵店都有，一應俱全，有400間餐廳畀你慢慢選擇，實有間啱你心水！有選擇困難症嘅朋友唔洗擔心，我哋亦於云云餐廳中揀咗幾間畀你哋參考參考：
場外食店一. 百年壽司老店！壽司清
喺日本有22間分店，本來於1889年起於「場內」經營，但經關東大地震後搬到「場外」，於「場外」嘅本店地方較闊落、舒服！位於築地嘅本店可算係百年老店，一場嚟到築地，點都要感受下百年老店嘅威力！
壽司清 築地本店
地址：東京都中央區築地場外4丁目13番9号（顯示地圖）
營業時間：星一至日（8：30am－2：00pm及5：00至8：00pm）、星期三休息
場外食店二. 1000YEN 鮪魚「面豬燈」飯！築地どんぶり市場
鮪魚就食得多，燒鮪魚面頰飯就真係未食過，網上食家形容為「像牛扒一樣的魚」，有牛扒嘅味道卻有魚肉嘅細膩感，無筋無渣，啱哂怕食生魚嘅朋友！
築地どんぶり市場
地址：東京都中央區築地場外4丁目9番5号（顯示地圖）
營業時間：星期一至六24小時營業，星期日及公眾假期休息
場外食店三. 手信玉子燒 口味多選擇！松露玉子燒
松露玉子燒雖然無大定歷史悠久，但係喺築地都好出名唔少人會嚟排隊食㗎！松露玉子燒口味有好多，例如有櫻花蝦、雞肉、紀州梅同海苔都有，當然有佢地出名嘅招牌松露玉子燒啦！松露玉子燒仲有包裝好嘅玉子燒買，雖然無新鮮出爐嘅玉子燒，熱辣辣啦好食，但係都不失為手信嘅好選擇！
