撐小店！三兄妹與無味精韓菜韓一窩 |西灣河有咩好食|

Q: 香港18區美食有甚麼推介？

新假期編輯已經為你整合了香港18區美食指，其中包括尖沙咀、旺角、銅鑼灣等 ......即睇更多詳情。

Jun 21 2016

到西灣河搵食，人人只會想起太安樓，其實這一個地方，好吃的還有很多。筲箕灣道、海利街交界的小橫街，有間新潮韓食店韓一窩，店內有三兄妹默默耕耘。大哥負責招呼人客、兩姊妹專責廚房，一派家庭式小店作業。

撰文：Mandy｜圖片：Hong

作風極低調，三兄妹連姓名都不願提，只有細妹婷婷較健談。後來，見到牆上兒童畫作，才知道一家人姓范。自小住公屋，父母要搵食，晚飯就靠兩姊妹搞掂。長大後，兩姊妹一個做泰菜，一個做茶餐廳。後來婷婷想創業，范哥哥二話不說，辭去維修工作，三人決定賭上畢生積蓄。計過度過，覺得韓菜較易處理，近排又Hit，覺得應該有得做。可惜缺乏經驗，起初開舖，三人亦走不出被騙慘局。「出牌公司咩都話得，但原來大廈太舊，要駁電纜入來，是天文數字。」食肆電量有限，最終餐廳只能用家用電磁爐煮食。父母閒時幫手洗碗，減輕三兄妹工作負擔。為了盡快收支平衡，首四、五個月開足一星期，至最近生意較穩定，才逢星期四休晚市。

開店約半年，從無做過宣傳，多得街坊撐小店，還自動幫老闆開fb及ig專頁，得大家支持離不開三個字——「無味精」。「以前喺泰菜館，見到師傅炒個金邊粉，味精、雞粉、砂糖，通通落兩大匙，我真係唔想賺呢種錢。」婷婷說。

自家店主打100%無味精，至於韓菜的靈魂辣醬，她們寧願自己調，以韓式醬料配番茄醬、辣椒粉來做，泡菜湯或部隊鍋，更拒絕用公仔麵味粉，食落菜式的確無坊間韓菜惹味，但街坊都食得放心。食材更是每日三兄妹到附近街巿親手揀。其中招牌菜海鮮泡菜湯飯，更不計成本用上新鮮海鮮，大蜆、沙白蜆及蝦是基本款，有時見當造，還會加料用上鮮鮑魚或象拔蚌仔，性價比超高。不過最估唔到的，是另一鍋物「一人部隊鍋」，深受附近小學教師歡迎，「唔知係咪工作壓力大，以為老師會食得健康，點知腸仔餐肉反而受歡迎。」婷婷笑說。