估唔到香港地仲可以見到呢啲「只有山水,沒有高樓」嘅奇景!
 估唔到香港地仲可以見到呢啲「只有山水,沒有高樓」嘅奇景!

緩跑南生圍 山貝村尋隱世湖景@FIT DIVA

博客

廣告

Text & Photo byFIT DIVA

keep fit係女人嘅終身事業,但我實在太怕悶,所以千篇一律嘅運動唔啱我。呢排難得天氣涼爽番啲,搵個地方郊遊最好不過!南生圍大家就去得多,不如今次再玩得深入啲,緩跑入人煙較稀少嘅貝貝發現地——山貝村,尋找靚到爆嘅隱世湖景!

 

南生圍例牌賞景

記得對上一次去南生圍已經係幾年前嘅事,上星期特登舊地重遊,感覺上環境冇咩點變,只係多咗情侶影結婚相,同埋多咗人踩單車。

唔知係咪太多人朝聖,小木橋俾人踩到爛晒……
唔知係咪太多人朝聖,小木橋俾人踩到爛晒……

 

敬輝農場餵動物

行程以蠔洲路作為起點,一路向前行就到南生圍路,亦即是南生圍入口。入口處有個叫敬輝農場嘅地方,聽朋友講,裡面有菜田又有漁塘,仲可以餵山羊、白兔同錦鯉,近距離同動物互動,短暫感受下簡樸嘅農家生活,好啱一家大細家庭樂。但對我哋嚟講,最重要係入嚟醫肚,為接下來嘅行程儲定體力。原來農場主人只用有機方法種菜同養雞,供應嘅所有菜式仲係即叫即煮,夠晒新鮮健康,最啱我哋呢啲怕肥又為食嘅女士,不過提提大家,嚟食農家菜之前記得book定枱,免得白行一趟。

敬輝農場有片蓮花池,仲有好多得意動物!
敬輝農場有片蓮花池,仲有好多得意動物!

 

碩果僅存橫水渡

食飽飽繼續出發,沿住錦田河同山貝河繞一圈,經過小木橋、林蔭大道、士多,最後嚟到尾段渡頭,全長大約5公里。由於南生圍被錦田河同山貝河包圍,想前行出番去搭小巴一定要先過河,搭橫水渡就係唯一方法。南生圍橫水渡係香港碩果僅存嘅手動水上交通,雖然船程非常之短,只有1分鐘左右,但難得呢個年代都仲保留到咁古老嘅交通工具,唔少人都將佢當成旅遊景點,專程嚟搭下,體驗寧靜嘅水鄉風情。

不斷有好多人排隊搭橫水渡
不斷有好多人排隊搭橫水渡

 

緩跑小路 走入山貝村

過咗河繼續向前行會見到新式住宅區山貝河畔,左手邊係古色古香嘅山貝村公所,好奇心驅使下決定向左跑。村入面仲保留住用青磚起嘅舊村屋同祠堂,從精緻嘅屋頂裝飾推算,呢啲村屋有可能建於清末時期,好有歷史價值,帶有歲月痕跡嘅牆身亦令呢個地方感覺更有味道,充滿古樸氣息。

過咗河直行冇耐就見到山貝村公所。
過咗河直行冇耐就見到山貝村公所。
仲有歷史悠久嘅磚屋。
仲有歷史悠久嘅磚屋。
然後你會搵到同樣歷史悠久嘅林氏家祠,即係祠堂呀!
然後你會搵到同樣歷史悠久嘅林氏家祠,即係祠堂呀!
呢條緩跑小路旁有一大片田,仲有好多唔同種類嘅花,天空又靚,空氣又清新。
呢條緩跑小路旁有一大片田,仲有好多唔同種類嘅花,天空又靚,空氣又清新。

 

山貝村盡頭有隱世靚湖

緩跑5分鐘左右,就去到山貝村嘅盡頭,穿過花草叢,眼前竟然出現一片超大嘅湖,完全望唔到市區高樓,感覺好似置身古裝劇啲場景一樣,真係點都估唔到呢度竟然隱藏住咁靚嘅絕色美景!閒時過嚟緩跑吸收下新鮮空氣,或者放狗散步認真唔錯!

估唔到香港地仲可以見到呢啲「只有山水,沒有高樓」嘅奇景!
估唔到香港地仲可以見到呢啲「只有山水,沒有高樓」嘅奇景!

 

 

交通資訊

元朗站去南生圍起點:

從港鐵元朗站G2出口,過對面朗日路新元朗中心巴士站,搭巴士76K,或者小巴36、37、38、75、76號,去到紅毛橋站落車,沿住南生圍路向前行就到南生圍入口。

山貝村去元朗站:

搭完橫水渡過河,見到山貝河畔,行去大門位置車站搭小巴611號,於西鐵元朗站落車。