全港最大 80張澳洲 彈床 殺到香港【九龍灣有乜玩】
自由式區 Free Jumping
呢個區域係最大嘅 彈床 舞台,有25張相連 彈床 ,玩家可以隨意喺 彈床 之間跳躍,或者喺傾斜嘅轉角位反彈。不過要留意,基於安全理由,每張 彈床 只可以同時容納一個人,跳嘅時候記住留意附近有冇人喇。
牆跑區 The Wall
牆跑絕對係難度分滿分嘅區域,係一個由奧運會標準嘅彈床(performance trampoline) ,幫你製造更強勁嘅彈力。玩家可以利用 彈床 嘅彈力,喺牆上面做出唔同嘅動作。不過由於難度較高,所以初學者就唔適合玩喇。
彈跳入樽 Slam Dunk
外國近年開始流行一項由籃球演變出來的新玩意,稱為Slamball,在一個標準籃球場上,兩邊的籃底之下加裝幾塊 彈床 ,讓不夠高的球員都可以享受入樽的感覺。雖然呢度無標準籃球場,但單手入樽不是夢,只要喺呢個區域,利用 彈床 跑道嘅彈跳力,跳幾次建立咗高度之後,就可以輕鬆入樽。練多幾次之後,花式入樽都絕對難你唔到呀!
Big Bag
顧名思義,呢區嘅賣點就係呢個大袋,呢個巨型充氣袋位於翻躍跑道嘅末端,坐落喺五英尺嘅深坑之上,係一個練習花式嘅好地方,可以毫無顧慮咁撻落充氣袋上面。
閃避球場 Dodgeball
閃避球相信大家都玩過,但係彈住咁玩你又試過未?Dodgeball以8對8嘅形式進行,啱晒一大班朋友一齊玩,現場仲會有球證,確保大家喺冇犯規同埋安全嘅情況下進行遊戲。
巨型彈床 Super Tramp
呢張4米x7米嘅巨型 彈床 ,符合奧運規格,彈力比一般 彈床 高,可以為玩家提供更高更彈嘅空中飛躍體驗!
教練話,玩 彈床 最緊要就係安全,所以場地入面嘅 彈床 全部符合國際標準,通過澳洲彈床公園協會嘅安全標準。而且每區都會有工作人員講解玩法同埋安全守則,加上場地規定玩家喺 彈床 樂園入面需要著住防跣襪 ($20),可以減少意外。
嚟玩 彈床 ,衣著最緊要舒適輕便,著長褲嘅話就可以預防失手嘅時候,畀 彈床 之間嘅磨擦力整親喇。而眼鏡、手錶呢類飾物係唔影響彈跳嘅,不過電話就最好放喺場外喇。
唔講唔知,原來玩10分鐘 彈床 ,運動量已經等於跑咗30分鐘,所以係一個既健康又好玩嘅室內運動。不過,初學者體能未必可以跳到太耐,因為好快就會開始喘氣,所以建議大家可以先試玩一個鐘,感受吓 彈床 上嘅感覺同埋離心力等等,千祈唔好心急想一步登天玩花式。