食家評語
小安安
餐廳名：秋葉餐廳(已結業)
無味的炒烏冬 2009-03-23 19:13:54
來過幾次食晏，都覺得呢度的午餐水準唔錯，可以一試再試；可惜，今次叫炒烏冬，就令我幾失望。
我叫的係日式海鮮炒烏冬，奉送羅宋湯同餐茶，盛惠33蚊。講真，都唔會預有好多海鮮，點知奉上來的時候，只見全碟都係差唔多色澤，啡啡的豉油色，最突出的只係青椒絲，要搵海鮮的蹤跡都幾困難，最後搵到的係蝦仔同埋極細條的魷魚鬚，跟住都好似無其他海鮮啦。咁都算，最弊食落居然係無味，全碟得一個味，就係豉油味，「海鮮」無味，烏冬無味，成碟都係咁上下，真係好失望。
主菜唔掂，好在羅宋湯同飲品都唔錯，補番少少數。
人均消費：32
評分：食物 
服務
環境
食評有否幫助？
點擊表情圖標為評家打分。
0人
0人
小安安
餐廳名：龍華皇宮酒樓
壽宴 2009-03-23 19:11:11
老父生日，為左方便就腳，家人選擇呢間早排賣一蚊雞粥優惠長者的酒樓幫老父做壽。
最初諗住價錢應該好平，一來位處大興村，二來金融海嘯，好多食肆都推出大特價套餐，點知呢個名為「滿堂吉慶」套餐都要2,480元一圍（包加一服務費、茶芥、鵲局耍樂、卡拉OK、大生力三枝同汽水六罐），合共三圍，佢地俾左一間都幾大的房間（唔知係因為咁貴先有呢間大房，定係咁大間房要咁貴）我地，等屋企人打麻雀的打麻雀，傾偈的傾偈，非常闊落。
食物方面，例牌飲宴菜式，有乳豬拼盤、炸蟹球、堯柱甫、蟹肉西蘭花、海皇翅、豉油雞、石斑、冬菇炆鵝掌、炒飯麵、壽包等，水準普普通通，我最鍾意係海皇翅，都幾多料，翅都唔少；清蒸雙石斑幾大條，肉質幾嫩。水準麻麻的就係小唐菜冬菇炆鵝掌，冬菇係就係大大粒，又厚身，但幾硬，鵝掌就好瘦弱。
最搞笑係臨尾送上的壽包，數量居然有24個之多，每人要食兩個，一送上來，場面都幾壯觀，我太飽無食到，但家人居然讚不絕口，話熱辣辣，細細粒，幾好食，於是係咁食，廿幾個小壽包好快就無晒，去貨相當快！
人均消費：300
評分：食物
服務
環境
食評有否幫助？
點擊表情圖標為評家打分。
0人
0人
小安安
餐廳名：榮記
估唔到幾好味！ 2009-03-23 19:09:06
北角地膽又帶我去食新野（其實係間老店，只係我未去過！）。
咪睇呢間門面幾麻麻的茶餐廳，但朋友話無論日頭定夜晚都幾多人幫襯喎，咁就真係要試試。
先睇價錢，快餐真係幾抵，我揀左呢度的快餐－－星洲炒米配凍奶茶（28蚊），朋友就叫左沙薑雞配湯同熱檸茶（29蚊），三十蚊唔使的午餐，北角區唔算多，抵！
食物質素又如何？我的星洲炒米送來，咪睇佢細細碟，撥開原來都幾多，食落唔油膩，唔會滿咀油，配料有蝦（唔係玻璃蝦，有蝦味）、火腿等，米粉幾入味，辣辣地，唔錯！朋友叫的沙薑雞先多，一碟飯居然十幾件雞，薑茸亦唔少，真係絕不欺場，不過朋友稍嫌Ｄ雞有少少唔熟。另外，我見其他檯的快餐都好吸引，好似排骨咁，都好大碟，難怪咁多人幫襯。
除左快餐外，仲有炒粉麵飯，連飲品都係32蚊左右，都好抵，下午茶仲平到只係22蚊添。晚飯就有小菜套餐供應，真係幾多選擇。
我諗就係因為呢度一來都幾多選擇，二來價錢都幾抵，三來食物質素都唔差，所以有咁多人幫襯啦！
人均消費：28
評分：食物
服務
環境
食評有否幫助？
點擊表情圖標為評家打分。
0人
0人
小安安
餐廳名：茶軒台灣料理珍珠奶茶
坐得舒適食得的式 2009-03-23 19:05:36
以台灣連鎖食店來計，茶軒的價錢唔算平，食物亦都唔算好突出；只不過要在銅鑼灣食晚飯，坐得舒服就腳又唔貴的話，其實選擇唔多，所以先揀茶軒。
的確，呢間茶軒好多梳化椅，座位都幾闊落，而且人流唔算多，坐耐少少都唔驚俾佢趕。
講到食物，水準其實好一般，而且都係份量非常小，我地叫左一個二人套餐（168元），表面上有小食、涼拌、主菜同飯，好似好多野咁，但通通都好的式：
1.小食：古早味春卷，切碎成六小角，實際得兩條，都炸得幾熱辣辣；
2.涼拌：手拍小黃瓜，真係好「小」，幾辣，非常細碟；
3.兩個主菜：無錫小排骨和鱆魚雞粒蒸豆腐，小排骨幾入味，有鎮江醋味，但亦都係好「小」，細細碟，逐粒食都唔多夠喉，而豆腐係現成貨但幾滑，鱆魚又係細細粒，同樣又係唔夠喉。
再加兩碗珍珠米飯，其實只不過係白飯，而且仲係幾硬身接近乾水的飯，食完都幾頂住個胃。
另外，呢個套餐唔包飲品，若想嘆半珍珠奶茶，就只可以半價的「優惠」價錢先得啦！結果我同朋友都無嗌飲品，齋飲熱滾水。結果埋單盛惠180多元，每人差唔多要100大元。
食完呢餐，腦海就湧出八大真言：「坐得舒適，食得的式」！
人均消費：100
評分：食物
服務
環境
食評有否幫助？
點擊表情圖標為評家打分。
1人
2人
