HK Express 推出新獎賞計劃｜會員制 5大著數
HK Express Reward-U特別之處
咁呢個Reward-U 積分計劃有咩特別？
積分換機票
兌換機票則要有最少40,000 Reward-U積分，可以兌換前往HK Express 任何航點嘅機票，最平嘅機票40,000分就可以換到，而如果想買貴啲嘅機票但唔夠積分則可以信用卡支付餘額購買。可以揀用哂積分換或者用部分積分再額外付款兌換機票，所兌換嘅只係機票票價部分，稅項同其他費用就要用信用卡結算。
港幣$1＝10分
由5月開始，每次透過HK Express官方網站或手機應用程式預訂機票，就可以以「港幣$1＝10分」換取Reward-U積分。即使訂嘅係超平機票，亦可換取積分。而當中機票票價及提前於網上預訂托運行李、機上餐點、優先辦理登機手續、以短信發送行程單、預先選位、額外購買的嬰兒機票可以換取積分，而稅項／其他費用則唔可以換取積分。
「Reward-U小隊」計劃
除咗自己買機票有得儲積分，更有一個「Reward-U小隊」計劃，最多由5個人組成，而成員間可以共享積分。成員當中會有一個「隊長」全權管理及兌換積分。名單每年只可以改一次而且隊長可以隨時使用積分，所以要諗清楚同邊啲人組成一Team同揀清楚邊個做「隊長」！如果唔係一組嘅又想畀積分其他人，每次交易就要額外收取港幣$250作為手續費。
免年費、3年有效期
成為會員會完全免費，而積分則會由出發日期起計，有3年有效期。積分每月底結算，無論幾多號入積分都會當作該月最後一日。如2016年4月15日入積分，即會於2019年4月30日到期。
可補回積分
雖然計劃係5月先開始，但亦可以登記會員後補返今年2016年1月起已乘搭嘅航班嘅積分。如果預訂嘅時候忘記提供Reward-U會員號碼，亦可以係旅程開始之前入HK Express網頁，用「管理我的訂位」補返Reward-U嘅會員資料換積分／旅程完結之後，用「補發積分」嘅網頁，填返資料就可以拎返積分。但如果經旅行社、第三方網站、其他渠道訂機票就可能會換取少啲嘅積分啦。
登記會員方法
上Reward-U網址填返少少資料就OK架啦！
