【自助餐放蛇起底組】$298 鐵板燒 +點心任食 3.5小時Brunch
這個半自助餐可食足3.5小時,食物主要分4大專區:壽司刺身、鐵板燒、點心及甜品。餐廳設一大排落地玻璃窗,自然光充足,環境開揚,很有假日氣氛。
刺身新鮮厚切 選擇只有3款
先講壽司刺身。刺身只得3款:三文魚、鱆紅魚及甜蝦,都是大路貨色,不過切得夠厚,咬起來,很有質感,而且感覺新鮮。壽司即叫即握,豆皮壽司、波子壽司、玉子壽司、三文魚及蟹柳、加州卷等,很啱小朋友食,師傅手腳夠快,不用排大隊。推介是「吞拿魚手卷」,魚香豐盈,紫菜又夠脆,如果加埋葱花就更好。
刺身得3款選擇,太少了﹗
鐵板燒無肉食
主打的 鐵板燒 ,除了花蛤和XO醬腸粉,其餘只得幾款蔬菜。蔬菜都燒得好,翠肉瓜外面金黃,內裡juicy;花蛤夠肥,食落有牛油香。銅鑼燒最掂,師傅用十勝紅豆在鐵板上即做,軟綿綿,又唔太甜,記得留肚食。不過整體選擇實在太少,食得未夠盡興。
中式點心 新鮮可口
行去粵菜廳那邊,有大約十多款中式點心,以及四款前菜。蝦餃、燒賣、叉燒包都有齊。另外亦有唔少脆卜卜的選擇,好似炸雲吞、春卷、素鵝等,每一味都新鮮可口,脆卜卜點心入口仲脆,不油膩。
主菜份量少
主菜六選一,有雞、牛、魚等選擇。記者點了燒帶子,很細隻,完全沒有主菜的氣勢。另外揀的「柚子一字排」就炆得幾入味軟腍,收貨。另每位附送一客煎鵝肝和海鮮湯泡鴛鴦飯,前者以鐵板煎香,惹味;後者是以脆米及飯煮成的泡飯,有蝦粒拌上,味道尚可。
甜品時間
至於甜品,細細一張枱,簡單幾件餅,一眼睇晒,不要抱期望,在蒲飛枱食飽點好過。
總分:6.5/10
百物騰貴,同屋企人在酒店飲茶,至少都二百蚊位﹗現在三百左右就可以任食,而且坐得舒服。每款食物,其實都食得出用心,不過,老老實實,食物款式不算多,而且幾乎沒有貴價食材,連 鐵板燒 都沒有肉類供應,實在令人有點失望。服務不錯,食足3.5小時、refill也快,讚!