|18區掃食|西灣河發現 4吋厚巨型豬扒包
入太安樓前 歎巨無霸豬扒包
入太安樓前，強烈推介大家行過幾條街，歎個巨無霸豬扒包先！超過一吋厚的大大塊豬扒，炸前以人手拍鬆，食落肉質鬆化，漢堡包上勁多芝麻，加 了牛油微微烘香，夾埋豬扒、番茄及生菜及淋上秘製芥茉籽醬，整個包成4吋厚，食一個當lunch已很飽。豬扒包即叫即製，要等大約十分鐘。
星河
地址:西灣河筲箕灣道138號富裕中心地下8號舖(顯示地圖)
電話:92275013
營業時間: 12nn-8:30pm(星期一休息)
太安樓生力軍 日式班戟店
剛開業三個多月的這間日式班戟店，店主Jason曾在酒店當廚師，有造甜品經驗。最熱賣的焦糖木糠班戟，班戟皮煎好後用風扇吹，食落會更脆口，捲前加少少忌廉，食到底都唔會淡茂茂，再加上木糠、自選雪糕和焦糖醬，嗜甜的最愛！店內還有少量鹹味款式，芝士配火腿蛋班戟，煎、捲整個過程都在班戟爐上進行，動作要快才不會燶。店子不定期推出新口味，不過暫時只有一個班戟爐，班戟即叫即製，想食就要等下啦！
I love戟日式班戟專門店
地址:西灣河筲箕灣道57-87號太安樓55A舖(顯示地圖)
電話:從缺
營業時間: 星期日至四1pm-11:30pm星期五、六1pm-12mn
韓國人主理 無骨炸雞可樂杯
這間由韓國人主理的小食店，10個有8個都會叫無骨炸雞配可樂杯，好多OL幫襯！下層放可樂，上層放炸雞，一手拎晒啱晒邊行邊飲，方便到極。炸雞主要用雞胸肉，大件得嚟夠晒咬口。淋上甜辣椒醬後再撒上芝士碎。即叫即炸，都要耐心啲等5分鐘。店主仲識講少少中文同普通話，好nice！
無骨炸雞連可樂 $28 人氣之選，都有8-10件，啖啖肉，雞肉頗滑嫩，醬汁偏甜帶微辣。
K Food
地址:西灣河筲箕灣道57-87號太安樓A33B(顯示地圖)
電話:6700 7087
營業時間: 12nn-10:30pm
人龍魚蛋檔 靈魂沙嗲汁
$5一串的魚蛋好耐無見！雖然呢檔叫魚蛋佬，但店主話食的重點絕對不是魚蛋，而是食這裡的沙嗲汁!小店一共只賣6款食物，分別是魚蛋、齋、腸仔、牛丸、魷魚及牛栢葉，全部都無加味精，先以清水滾熟，落單時再浸入沙嗲汁內，醬汁沙茶味重，後勁帶辣，超惹味，唔食得辣既唔好蘸咁多汁，唔怪得夜晚成日有人龍！
魚蛋佬
地址: 西灣河筲箕灣道57-87號太安樓A28B(顯示地圖)
電話:從缺
營業時間: 2pm-8:30pm
超抵飲！勁足料珍珠奶茶
食到咁上下，當然要飲返杯嘢！這家台式飲品店，學生哥就鍾意幫襯，珍珠奶茶系列，奶茶茶味適中，珍珠微甜煙韌，杯杯都勁足料，超抵飲！另外用新鮮生果製成的果汁、沙冰都好好飲！店內還有少量小食，薯條加薯格都係廿蚊。
今日真珠茶專賣店
地址: 西灣河筲箕灣道57-87號太安樓A54B(顯示地圖)
電話:從缺
營業時間: 12nn-11pm
芝士拉絲 爆多料餡餅
這小食店的餡餅做得出色，超足料，最啱切開一半同friend share食。古祖風味餡餅內是滿滿的豬肉、芝士和青蔥，加埋自家製燒烤醬，用了20年果皮、南乳及薑蔥等每日新鮮熬製，味道與豬肉非常夾，更有淡淡果香 味。另外更有甜味選擇，抹茶牛奶風味最受年輕人歡迎，把抹茶粉混於吉士醬內，加Mozzarella芝士塗滿餡餅後煎香，甜而不膩。
食好D
地址: 西灣河筲箕灣道57-87號太安樓A63A(顯示地圖)
電話:52284212
營業時間: 11:30am-10pm(星期三休息)
台灣紫薯地瓜 秋冬限定燒仙草
台式小店除了招牌台式挫冰外，近來小店更有秋冬限定新品～燒仙草。用上大量仙草乾熬煮，食落似飲得的龜苓膏，配埋芋圓、紅豆等一齊食，一碗夠晒滿足。芋圓、粉圓都是老闆娘自已揉，無加香料或增香劑，味道天然，口感煙韌，更會有不同口味不定期出現，包括紫薯、地瓜、紅心地瓜、抹茶等，超俾心機，經過隨時有驚喜。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
