食過海底撈真係番唔到轉頭
食過海底撈真係番唔到轉頭

「 食過海底撈真係番唔到轉頭 …」@ 港女友 Hong Kong Girlfriend.

飲食

廣告

大家有食過 海底撈 嗎?我諗即使未食過,你都會聽過佢個名。我就食過幾次,我諗佢出名嘅唔係啲食物,而係嗰種俾百幾蚊可以做皇帝嘅服務態度。

撰文:港女友 Hong Kong Girlfriend.

「 食過海底撈真係番唔到轉頭 …」

海底撈 其實唔貴,每次去都係食百幾蚊左右,喺香港出街打個邊爐都差不多。材料多,但我個人來說都感到不安心,返大陸實在唔敢食肉,我怕食咗啲我唔想食嘅肉,呢啲都係我個人膽小又龜毛。Any肥,今次唔係想探討食品安全。

去過嘅朋友都知,由等位嗰刻你已經係貴賓,等位區好大,有櫈有枱坐有娛樂有嘢玩有嘢飲有嘢食。隔籬仲有得修甲乜乜乜, 確保你唔使無聊等位,入到去每張枱都總會有個熱心員工為你服務,攞熱毛巾圍裙 女嘅俾橡筋你,見到你部電話喺枱又俾個透明袋仔你袋電話,幫你斟茶遞水呢啲基本嘢啦。嗌拉麵又有人喺你面前即席手拉麵,今年我生日同朋友去咗食 海底撈 ,幾個員工一齊攞晒燈牌 推埋蛋糕,唱晒生日歌出來,差啲以為係求婚。

前幾日去我哋嗌錯咗嘢,同行有個內地朋友 海底撈經驗者,佢話退回去啦~我哋話下唔得咩?佢話:從來只有客_海底撈,海底撈從不_客,就係咁,無條件退回。然後我就開始明白,點解內地人喺香港咁容易發難。海底撈簡直係鼓吹暴發戶心態,俾百幾蚊就有貴賓級服務,顧客永遠是對的就助長晒啲無理要求,難怪佢哋落到香港都覺得大聲啲就有理,習慣呢種服務真係會令啲顧客自我嚴重膨脹,真係以為俾錢就大晒。

去過幾次,妹仔命的我都係唔習慣被服侍得太周到,去廁所有人幫你開埋水喉唧埋梘液真係too much喇。我都係覺得被侍應兇番轉頭舒服啲,雖說今時今日咁嘅服務態度係未夠,但我食個飯啫!都不忍見到啲員工太卑微,喺香港做服務業的確有尊嚴得多。

圖為今年生日我與舉牌員工合照,真係尷尬到核爆 ,生日啫!唔使求婚咁大陣仗,但如果你個人浮誇開,我建議你試試去慶祝生日。

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..