果欄
果欄

今期 果欄 食咩好 ? 5大入秋 水果 Best Pick

飲食

廣告

上月 油麻地 果欄 大火,不少果攤受牽連,不過經過一輪搶救後,生果 檔都逐一回復正常,開檔做生意!今日餓底探員特意微服出巡,睇下今期 果欄 有咩好食!

撰文、攝影:Perfect Hill

中午12時到訪,發現開門做生意的生果檔集中在 果欄 外圍,即新填地和石龍街交界,大約有20檔,點揀好?好彩買生果前,我都做足資料搜集,當中「欄之選」和「豐盛生果」特別多網民力捧,我就去睇下咩情況。前者賣的水果款式多,而且來自世界各地,而後者舖面面積較細,但主打日本貨。兩間的職員都好好人,教人揀靚生果,仲請我試食。(o拿,我係卧底,無檔主知我身分,保證好公正。)老闆話,10月入秋,有超多生果當造,Best Pick首選必數 提子 、 布冧 、 奇異果 、 蘋果 、 柿 等,就等我率先試食,睇下邊款好味又抵食啦!

1. 新品種!彩虹 奇異果

價錢:1包$58,每包有7粒

點揀:外表光滑少毛,想即食的話,記得揀軟身少少的!

味道:產地來自福岡的彩虹 奇異果 ,近期超流行,體積如雞蛋般大,外型比一般 奇異果 細,之所以稱為彩虹奇異果,因為外圍果肉是青色,至中間部分是桃紅色,近核的又變白色,同埋最重要,佢比新西蘭的甜好多,甜度達17度,最適合怕酸的朋友!(日本人好鐘意把水果的甜用數字表達出來),而且維他命C更比一般奇異果高一倍有多,對皮膚超好。

2. 連果皮都甜!綠寶石 布冧

價錢:$50/4個

點揀:果攤職員爆料,市面有好多A貨,識揀的,記得揀底部呈尖形的!同埋要精晶瑩剔透。

味道:被稱為「 布冧 之王」的美國綠寶石,已步入尾季,要食要趁早。何解成為搶手貨?因黃色果肉超甜又多汁外,最過分是連青色的果皮都是微甜啊!薄皮之餘,細嚐時仲有蜜糖味!一咬,即刻成口爆汁,好誇!可以連皮食,超方便!

金彩虹 布冧 (上) 價錢:$50/6個
黑夜玫瑰 布冧(中) 價錢:$50/4個
綠寶石布冧(下)價錢:$50/4個

3. 超人氣! 香印 青提子

價錢:$150/一抽

點揀:色澤翠綠、豐滿圓潤,粒粒提子有如發光,最好揀一排排生得好整齊的!認住要JA全農長野果場出產的,特別清甜。

味道: 超甜!比日本軟糖更甜!全公司女同事食完一粒,都話好食到要Encore,特登去 果欄 買!來自日本長野信州 香印 青提子,大大粒,食落有花香/龍眼味!我終於明白老闆何解高度推薦,佢仲話,呢家少人食巨峰 提子 ,因紅酒味未必人人啱,所以多人投歸青提懷抱。

4. 青中透紅!土岐 蘋果 (TOKI)

價錢:每個$18,3個$50

點揀:青色的果皮上,呈現一絲絲淡淡的粉紅花紋,聞落有強烈 蘋果 香。

味道:餓底探員向來少食青 蘋果,但今次這個土岐青 蘋果,來自日本最出名盛產蘋果的青森,體積比我拳頭更大外,果肉飽滿多汁,味道如啤梨般清甜,令我對青蘋果改觀,難怪亦有人稱他為水蜜桃蘋果。當造期由10月開始至11月,而且產量少,記得早點去買!

5. 日本第一!方型 富有柿

價錢:每個$35,2個$60

點揀:扁平方正,富光澤

 

味道:來自日本和歌山縣的 富有柿,出名甜爆(14 度),而且果肉細滑緊緻,有纖維但不粗糙,又無核。多食仲可以抗衰老、抗氧化,因內含豐富單寧、維他命A、β-胡蘿蔔素、茄紅素等。

豐盛果欄
地址:油麻地石龍街1號
營業時間:星期一至日10am-7pm

欄之選
地址:油麻地石龍街1號
營業時間:星期一至日10am-7pm

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..