哈迪斯 的回信! 會回來嗎？引爆網民分享感人回憶

唉！如果有金主肯將哈迪斯帶回香港就好啦！因為呢間食店盛載咗唔少香港人嘅回憶，無論昔日員工，抑或過去情侶，大家與哈迪斯總有一段情，而呢段感情係永遠都忘不了。

哈迪斯工作好回憶 我的第一份工

每人總有「第一次」，原來唔少港人喺哈迪斯踏出咗佢嘅第一次。有人話哈迪斯係佢第一份工，亦有人話哈迪斯令佢識到第一個女朋友，無論日後變成點，依加諗返起，點滴仍在心頭。

就好似以下呢位網友，一位當年嘅中四生，就將自己中四五返工生涯獻咗俾哈迪斯。佢話平日放學就返工到凌晨12點，當時人工仲係15蚊個鐘，自己搵零用錢，聽到都覺辛苦。但佢隔咗咁多年，都仲多謝哈迪斯俾佢嘅美好回憶，並想藉此多謝以前舖嘅員工，幫手製造驚喜俾自己心上人，成功將蛋糕送出。

當年10幾歲！ 第一份糧就係食哈迪斯兼拍拖

另一位網友亦不禁想當年，講起佢同前度嘅回憶。當年呢位網友都只係十幾歲，出咗第一份糧就請前度去哈迪斯食飯。佢話嗰陣個餐真係好鬼好味，可以見到當中有嘅唔單止係美食，亦係一份情。

高手在民間！ 網民教你整哈迪斯磨菇飯

講哈迪斯，緊係要講蘑菇飯啦！有網民表示磨菇飯其實好易整，只要用牛肉湯加麵粉，隨量加下調味整好個汁，再隔返未溶嘅麵粉就搞掂。不過佢亦補充工序繁複，有時都唔係咁想整。所以話，哈迪斯快啲返嚟啦。

哈迪斯的回信下半部 香港投資者資格

依加誠心求金主，哈迪斯總部回信講明，要具備咩條件嘅人先做到投資者。封信下半part就話：「如果個人或公司想成為投資者，必須要有＄2500萬美金，當中三成為流動資金。除此之外，個人或公司亦必須有營運餐廳及於連鎖店工作的經驗。」

究竟有冇金主願意帶佢返嚟？其實版主都係膽粗粗電郵到呢個地址[email protected]，有心人有興趣就mark低佢啦。

哈迪斯最新情況 美國版與香港餐單的分別

數到哈迪斯招牌菜，當然唔少得薯圈、磨菇飯、肉醬熱狗⋯⋯仲有洋蔥圈、西部牛仔飯、牛仔芝堡、三藩市芝堡，通通都係香港人至愛。

不過check返依加美國哈迪斯餐牌，完全冇飯粉類，可能係外國人唔興食飯啦⋯⋯不過放心，仲有美味薯圈、洋蔥圈、炸雞、曲奇、三藩市芝堡等，飲品仲多咗奶昔。

網址：http://www.hardees.com/