限定拉麵橫濱直送@ Dining娜
香港人就不嬲鍾意食日本嘢,尤其係我Dining娜,除咗夠特色又好味,最重要嘅係日本人對料理嘅熱誠同執著。就好似拉麵咁,唔同嘅湯底,要配搭唔同嘅材料,就連麵條嘅粗細都跟住變化,先可以呈現最完美嘅口感。本身諗住飛去日本一解我對拉麵思念,點知突然去唔到,不過上星期俾我喺香港搵到好嘢。
東京橫濱拉麵師傅後藤將友嚟咗香港主持期間限定之快閃拉麵店,將銅鑼灣鳴門魚湯麵亭搖身一變成為後藤將友師傅喺橫濱擁有嘅三間拉麵店,包括「G麵7」、「口麵ズ」同埋奪得米芝蓮推介嘅「啜磨專科」三個拉麵品牌,仲為天氣熱爆嘅香港特製三款冰涼清新冷拉麵,兩款湯麵及一款沾麵。聽店長講,因師傅對自己品牌拉麵好有要求,無論湯底、麵條同配料都係由日本空運到港再加工,百分百地道風味。
後藤將友
喺「大手拉麵」從事拉麵工作兩年,期間亦開始進入意大利飯店等吸取西餐經驗。至2002年加入横濱「麺場浜虎」工作,七年後獨立發展,在2009年成立其個人第一個拉麵品牌「G麵7」,至今喺橫濱擁有三間拉麵店。
每碗拉麵嘅麵條皆由師傅特製,煮熟後要過水,確保每條麵條入口夾滑唔痴身,條條分明。
日本師傅向來一絲不苟,無論係配料擺法都十分講究,要確保啱心意先可以拎俾客人享用。
雞節鹽味拉麵
入面配有雞脾扒及叉燒,再撒上雞節,係日本人地道新興食法,口感同平時嘅食法好唔同,少咗一份酸味。
南瓜花生醬雞肉冷麵
香港7、8月天氣超熱,貼心嘅師傅特別設計冷面,加上港人鍾意嘅花生醬同黑蒜油,食完特別透心涼。
鰹魚油正油沾麵
將麵沾上醬油及鰹魚油熬製嘅湯入面,就感受到當中嘅濃郁味道,麵同湯係絕配。
鹽味巴馬火腿蒟蒻冷麵
巴馬火腿通常喺拉麵材料入面比較少見,因為師傅有西餐經驗,所以將西餐材料融入冷麵,好有fusion感覺。
巴馬火腿味噌脆冷麵
呢款係日本6-8月期間限定嘅新出產品,特別之處係加咗童星點心麵,入口脆卜卜,日本一出已經好受歡迎,而家喺香港都可以試到啦。
正油拉麵
湯底由五種唔同嘅醬油熬製而成,配上慢煮雞脾扒及叉燒,味道濃郁,適合鍾意濃味嘅香港人。
鳴門魚湯麵亭
地址:銅鑼灣軒尼詩道489號銅鑼灣廣場一期201號舖(顯示地圖)
電話:2891 6800
營業時間:星期一至日 12pm – 10:30pm
香港18區美食有甚麼推介?
新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。