【自助餐放蛇起底組】$228生蠔和牛任燒 刺身壽司天婦羅放題
帆立貝無貨 生蠔頂上 仲正！
燒肉方面選擇都有好多，以劃紙仔嘅形式落單，豬、牛、雞、海鮮樣樣齊，牛有黑毛霜降和牛、熊本一口和牛；豬有極上黑豚肉；海鮮仲有帆立貝，全部任食，就咁睇落單紙嘅圖都幾吸引。
落單後上菜嘅速度算快，而且擺盤都幾整齊，但有漏單同上唔齊嘅問題。味道方面，厚切牛舌同黑椒一口牛肋肉重牛味，值得一試。但和牛質素就非常普通，牛味好淡近乎無味，而且油份相對地較多。海鮮方面選擇有好多，包括帆立貝、小玉貝、鯖魚、烏賊、手拳咁大隻蝦等。而呢一排因為無哂帆立貝，以日本生蠔代替！生蠔每面各燒3分鐘就食得，味道鮮甜，食落Juicy略嫌有蠔殼碎，但呢個價可以任食燒蠔都真係唔錯！其他海鮮就一般般啦。
刺身多選擇 食落唔多新鮮
燒完肉都想食返啲凍野，呢度嘅日式放題就可以滿足到。食得放題就梗係想狂食刺身，刺身有三文魚、吞拿魚、劍魚腩、大甜蝦、八爪魚、鮑片、北寄貝同玉子燒。刺身選擇係幾多，色澤都算唔，可惜得個樣，食落唔多新鮮。除咗三文魚同鮑片之外，其他食落唔太鮮味，甜蝦唔夠爽口彈牙、劍魚腩偏腥。
壽司有創意 味道見仁見智
9張任食紙，除了刺身，還有主食、炸物、天婦羅、各式唔同嘅壽司等。呢度嘅壽司都幾特別，有海膽三色花、海膽黑松露壽司、肉鬆菠蘿鰻魚卷同韓牛卷。壽司創意分滿分，但食落味道就真係見仁見智啦，而且呢間壽司飯偏濕。海膽三色花嘅海膽份量比圖嘅少，但味道唔錯。而肉鬆菠蘿鰻魚嘅配搭真係一流咁新穎，食落肉鬆味出，唔多食到鰻魚味。
環境舒適 服務一般
環境其實就好闊落，枱同枱之間分隔都幾遠，都唔會嘈。不過唔知點解有幾張枱明明係有抽油煙機，但係無人坐；其他枱無抽油煙機，但又坐哂人！究竟係點派位呢?服務方面除咗門口經理服務較好，其他店員態度一般，面黑黑極cool囉。
總結： 食物選擇多，而且抵食，一個價錢食哂兩種任食。不過食物賣相唔討好，除咗牛舌同生蠔之外，任食和牛及其他燒物質素比想像中差，唯日式放題刺身壽司選擇夠多，味道亦尚算中規中距勉強過關。
總分：6/10
