M記
M記

多塊蛋竟然平$2 ?! 5個難以解釋的M記大智慧

飲食

廣告

其實世界上有好多事物都好難解釋,就好似尋日蘋果報導M記後現代商業先鋒銷售計劃,定價豬柳漢堡$12.3,豬柳蛋漢堡$10。係呀你無睇錯,如果你願意食多隻蛋,你就可以比少$2.3,或者叫豬柳蛋漢堡。絕對係充滿大智慧呀!(由於麥當勞價錢並非畫一,所以以下價錢只以其中一間麥當勞分店為準)

 

1. 多塊蛋平$2豬柳漢堡逼你食蛋

其實M記有$10包呢件事係好嘅,大家可以平平地食個包,又唔駛夾硬叫個餐。但到底點解豬柳漢堡會比豬柳蛋漢堡貴$2.3呢?M記係唔係好想我哋食蛋呢?定係佢唔記得改豬柳漢堡個價錢呢?唔通一切只係一個美麗的陷阱?

 

2. 套餐的價值 到底汽水薯條值幾錢?

另一個令大家匪疑所思的,就係單品轉套餐嘅價錢啦,M記大部份套餐的價錢都係$22-$33,但細看之下,單品與套餐嘅差價實在係浮動不定:

  • 脆辣雞腿包:$18(單買) /$22(餐) –> 套餐+$4
  • 麥樂雞:$15.7(單買)/ $22(餐) –> 套餐+$6.3
  • 雙層芝士孖寶:$15.7(單買)/ $22(餐) –> 套餐+$6.3
  • 脆香雞翼:$18(單買)/ $31.8(餐)–> 套餐+$13.8
  • 魚柳包:$10(單買)/$30.2(餐) –> 套餐+$20.2

好啦,咁到底一個中薯條及中汽水,到底係值$4定係$20呢?我睇唔透 🙁

 

3. 快快手買錯餐 蝕本比多錢

大家千萬唔好笑我多餘,因為以下所講係真實經歷,單係購買同一堆食物,只要組合錯咗,足以令你蝕錢!我曾經幫朋友(唔係我)幫M記外賣,佢就先要一個豬柳蛋漢堡餐($29.5),再加個板燒雞腿包($18),埋單$47.5,大家知道問題在哪嗎?無錯啦,就係如果大家叫板燒雞腿包餐($31.8),再加豬柳蛋漢堡($10),埋單係$41.8,足足比少$5.7,之不過如果大家想比M記貼士,都無所謂嘅。 🙂

 

4. 自製真。雙層魚柳包 送多你一份包皮(再平$1.5)
嗱嗱嗱!又唔小心啦,雖然Double魚柳包有多份魚好開心,但你又再度中招啦,因為一個Double魚柳包係$21.5,一個魚柳包係$10,而兩個魚柳包係$20。咁如果大家唔怕用手將兩個包夾埋一齊,就可以有多一份包皮,再要平$1.5,各位點睇?

 

5. 牛肉與芝士 一片值多錢?

關於漢堡包,芝士漢堡包同雙層芝士孖寶嘅定價,記者覺得係一條好有趣嘅數學題。漢堡包價錢係$8.8,芝士漢堡包係$10.2,雙層芝士孖寶係$15.7,我哋已經有足夠資料去解構一片牛肉同芝士值幾錢,數式如下:

  • 芝士漢堡包-漢堡包 =芝士 ( $10.2 – $8.8 = $1.4 )
  • 雙層芝士孖寶-芝士漢堡包 =芝士 + 牛肉 ( $15.7 – $10.2 = $5.5 )
  • (芝士 + 牛肉) –芝士 =牛肉 ( $5.5 – $1.4 = $4.1 )

 

大家明白未呀?不過唔緊要,世界有好多嘢都好難解釋!

延伸閱讀:

【FOOD BATTLE】好味暖胃 4大日式咖喱飯比拼

【掃街王】九龍東小葵廣!藍田5大街坊美食

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..