味覺暢遊海南島！@Dining娜

（Presented by 海南四季）

呢排日日藍天白雲，咁鬼好天氣，忍唔住諗番起舊年去海南島旅行嘅梳乎時光，好掛住嗰度啲鮮甜椰青同地道嘢食，我（又）超想出走喇！唉，咁當然Dining娜都係同香港所有打工仔一樣，一年只係得嗰十幾日annual leave，就算海南島幾近都好，都好難成日飛囉！

啱啱知道最近銅鑼灣皇室堡新開咗間「海南四季」，就完全滿足我呢期嘅度假癮！餐廳佔地成20,000呎，裡面仲有10間唔同風格嘅VIP房。一入門口就會見到一大堆海南icon椰子，令人率先感受到濃濃嘅海南夏日氣氛，而且啲椰子唔係齋做佈置裝飾喎，係要嚟煮呢度招牌菜㗎！餐廳打正旗號主打海南島美食，招牌菜就係當地好hit嘅椰子雞鍋、正宗海南文昌雞，一路食一路睇遠處海景，咪當呃吓自己喺海南島度緊假，仲可以歎住冷氣無咁熱添，嘻嘻！

雞有雞味　走地文昌雞

講起呢度用嘅正宗海南文昌雞，嚟自海南自家農場嘅文昌雞，係食椰子肉有機飼料大，特點係由細喺山坡等地放養大約百幾日再圈養，真係好落本㗎！文昌雞係以白切為主，最緊要其實都係食隻雞嘅原味，入口雞皮黃又脆，肉質結實又彈牙，真心讚！好耐無食過隻雞咁有雞味㗎！

椰子雞鍋 清香滋潤邊爐

而家仲食麻辣火鍋？我呢啲貪靚OL又會驚食得多麻辣會爆瘡！好在近年流行以椰子嘅幽香清甜取勝嘅椰子雞鍋，試過呢度嘅招牌椰子雞鍋係用咗純天然海南椰汁、椰青水同椰子肉煮成，湯底清澈講究，味道分外清香鮮甜，感覺好鬼滋潤！加上用埋推介嘅海南文昌雞，滾出鮮甜，雞味仲會再出啲添！

後記：新開張 請食雞

聽老闆講，為慶祝餐廳新開張，海南四季仲會推出一籮籮著數優惠！

晚市每2至5位請你食半隻文昌雞，6至10位就直情送夠1隻畀你哋歎！下晝lunch時間嚟飲茶，每人即送1粒蝦餃同埋1碗是日糖水！咁鬼抵，唔好話我Dining娜唔提你！呢度火鍋、小菜、煲仔飯、刺身、串燒都有得食，下晝仲有即叫即製點心！約齊一班朋友嚟食晚飯，除開每人都係平均200幾蚊度啫，咁正環境，嘢食又好味，抵晒！

海南四季

地址：銅鑼灣告士打道311號皇室堡14樓（港鐵銅鑼灣站E出口）（顯示地址）

電話：3523 1368

備註：設加一，收現金及信用咭。

Facebook：海南四季Hainan Season