嘉頓
嘉頓

【3點3啦喂】深水埗嘉頓咖啡店 $25歎蛋糕+免費展覽 食完行埋嘉頓山

飲食

廣告

深水埗嘅嘉頓麵包廠你可能成日都會經過,但佢地下大堂嘅展覽廳同咖啡店,其實係開放比公眾人士,你又有無入過去呢?

撰文、圖片:Joan

深水埗 嘉頓麵包咖啡店

深水埗的嘉頓麵包廠,地下原來有個咖啡店,入咖啡店之前可以欣賞下個展覽廳先,裡面放咗嘉頓歷年出過嘅產品,由你阿爺阿嫲個代嘅勁懷舊餅乾罐,到而家大家都成日食嘅威化餅,成個package都有得比你睇個夠。

睇完展覽行去咖啡廳,環境闊落,有梳化位,可以比你歎住冷氣、食住Cake, Hea返一個晏就。

食物方面都係以輕食為主,有蛋糕、酥餅、麵包、撻等,全部都係自家製,係喺同層嘅餅房或者樓上嘅小廠房整,日日新鮮出爐,連空氣都瀰漫住一陣酥皮香。朝早去就只得雞批同餡餅賣,晏就先多啲嘢食!如果大家想懶洋洋地hea返一個晏就,呢度都係唔錯嘅選擇,不過6點就收(5點半Last order ),想去就睇時間啦。

嘉頓咖啡店

地址:深水埗青山道58號嘉頓烘焙中心地舖(顯示地圖)
電話: 2720 1055
營業時間: 星期一至日 8:30am -6pm
最低消費:$20/位
FB專頁:嘉頓有限公司

食飽行上嘉頓山 15分鐘睇深水埗全貌

講起嘉頓,就不得不提嘉頓中心後面嘅「嘉頓山」,如果食飽想行下,一出咗嘉頓,過幾條馬路去後面嘅美荷樓,沿著條晨運徑,行樓梯一路上,大約行10分鐘樓梯,就可以上到嘉頓山,飽覽深水埗同石硤尾嘅全貌。

順帶一提,上咗山之後就無廁所,所以食飽之後要解決咗先好行上山。同埋入黑之後,沿路行上去都係無路燈,所以記住帶照明工具,唔好仆落山。

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..