新年_花車_農曆
新年_花車_農曆

猴年初一至初三去邊好?9大賀年活動逐個睇!

生活

廣告

放假啦,放假啦!新假期祝大家新年快樂,身體健康!最緊要當然有隻足金金猴賀新春。但係初一至初三個個都放晒假,除了拜年仲有咩好做?精選了9款活動畀大家,希望大家新一年發過馬騮頭。放心放心,以下介紹的活動有室內、室外咩都有,包保大家有著落!

一:HelloKitty、布甸狗同你賀年!年初一花車巡遊

大年初一點少得花車巡遊!新一年第一日當然要喜興洋洋,成大班人湊下熱鬧,咁先有新年氣氛嘛。今年花車巡遊主題為「環球樂園.新春派對」,意味集合五湖四海嘅表演隊伍,總共13輛花車,當中有香港迪士尼樂園花車,到時大家一齊唱Happily Ever After~諗起有年Sam哥係花車上(同我)say hi,心都軟埋。如果唔想錯過車上每個靚仔靚女,可以帶定望遠鏡逐個睇。不過到時咁多人,邊行邊睇邊盯,都係睇路好啲。

新年_hellokitty_sanrio

Snoopy_農曆新年_花車巡遊
13輛花車
Snoopy_農曆新年_花車巡遊
花車巡遊路線旁會有大型擺設,其中有可愛的Snoopy同大家拜年。
Snoopy_農曆新年_花車巡遊
會有外國表演團體,在花車巡遊期間表現。其中,有來自德國的Dundu,一隻大型發光木偶,會在街上與大家交流。

花車會沿住廣東道、海防道、彌敦道及梳士巴利道前行,最後以香港喜來登酒店外作終點。雖然觀眾席嘅票經已售罊,但大家可以免費係巡遊路線兩邊欣賞。或者唔想同人逼,可以睇電視直播!

新春國際匯演之夜 2016
日期:年初一,2月8日
時間:8pm-9:45pm (無綫電視翡翠台現場直播)
巡遊路線:廣東道、海防道、彌敦道及梳士巴利道前行,香港喜來登酒店外為終點。

二:年初二猴年賀歲杯

如果初二就唔駛拜年嘅朋友,可以考慮到旺角大球場撐下賀歲杯,依加都仲有少量票可以買。當日總共有3場波,戲肉係下午4點開波嘅「香港代表隊」 對「香港聯賽選手隊」,領隊分別係莫耀強先生、詹培忠先生及貝鈞奇先生、梁芷珊女士,全場90分鐘。頭2場就有「香港女足80」對「香港女足90」、「香港經典選手隊」對「經典外援選手隊」,一齊支持本地足球吧!

《猴年賀歲杯》
日期:年初二,2月9日
時間:(第一場)1:30pm 全場40分鐘;(第二場)2:30pm 全場40分鐘;(第三場)4pm 全場90分鐘
地址:旺角大球場(顯示地圖
購票:城市售票網 (即日至2月7日晚上11時59分)
票價:正價票$100;學生及長者$30

三:年初二煙花匯演

睇完賀歲杯,直落維港睇煙花!不過想睇到成個景,都係要早啲霸位,再唔係等電視直播都唔錯。猴年當然唔少得馬騮頭,大會表示到時第二幕會爆出馬騮笑臉㗎!大家記得準備好相機,捕獲野生馬騮。但最最最最緊要係天氣好風向佳,唔係大家又睇晒23分鐘,八幕表演都搵唔到馬騮頭。

農曆新年煙花匯演
日期:年初二,2月9日
時間:8pm(無綫電視翡翠台現場直播)
地點:中環及尖沙咀之間的維多利亞港海面

四:年初三賽馬日

雖然大年初三係紅假,但馬要照跑。到時唔單止有馬睇,連獅子都有得你睇。獅子呀,舞獅個隻「獅」‥‥‥而且騎師風水師都會同大家拜年,今次仲唔鴻運當頭?

沙田馬場

賽馬日
日期﹕ 年初三,2月10日
時間﹕ 12pm-6pm
地點﹕ 沙田馬場(顯示地圖
票價﹕ 公眾席$10;遊客入場證章$130 (須出示有效旅遊證明文件)
購票﹕ 沙田馬場及指定場外投注處

五:紫色牛牛《神龍魔法師》

新年想沾啲洋氣?可以去位於中環嘅紫色牛牛劇場,睇下來自拉斯維加斯嘅魔法師表演。佢叫神龍魔法師,原來係《全美一叮》嘅選手,當年令到班主持笑到停唔到!如果想今年高高興興開個年,佢一定可以滿足你嘅願望。佢初一至初三無休,只係得返少量平飛,愈遲就愈貴喔。

《神龍魔法師》
日期﹕ 年初一至三,2月8日至2月10日

時間﹕ 9pm-10pm
地點﹕ 香港中環龍和道9號(顯示地圖
票價﹕ $523 / $435 / $385
購票﹕ 快達票

六:林村許願節

大家亦可以去林村許個願,希望好運臨到自己及身邊人。適逢林村舉行2016許願節,初一至初三都有嘢畀大家睇!初一早上11點就有署理行政長官點燈,初二下午2點至4點,同初三下午2點半至4點就有國際花車表演隊伍表演。而且初一巡遊𠴱13輛花車,翌日已經係林村展出,如果想近距離同花車影相,好把握時機啦,擺到2月22日咋!

農曆新年_林村_許願

2016許願節
日期:2月8日至2月22日
時間:9am-7pm
地點:林村許願廣場(顯示地圖
費用:免費
網站:http://www.lamtsuen.com/

七:幻彩詠香江升級版

年初三喺尖沙咀睇完煙花,年初三去尖沙咀都有嘢睇。就喺文化中心露天廣場,鐘樓隔離,共4個時段播出影片,每節約8分鐘,分別喺晚上8:20、8:45、9:15 及9:45。大家經過尖沙咀,望住海旁摯愛之餘,都可以抬頭望下露天廣場。事關一夠鐘就會有影像投射喺文化中心及鐘樓,同幻彩fing乾乾係兩個層次呢。

影像投於建築物上。
影像投於建築物上

「閃躍維港」3D光雕匯演
日期︰2月10至29日
時間︰晚上8:20、8:45、9:15 、9:45(每節約8分鐘)
地址︰九龍尖沙咀梳士巴利道10號香港文化中心露天廣場(顯示地圖)
費用:免費

八:呃like!中式Alice in the Wonderland

行入呢堆瓷具,就覺得自己好似愛麗絲咁縮細咗。趁住新年著新衫扮靚靚,就記得影多啲相。不過影相之餘亦唔好錯過商場啲換領品!話晒新年畀錢都畀得疏爽啲,一個唔覺意都可能簽夠千五蚊。只要用電子貨幣買滿千五蚊,就可換領「美心西餅鬆脆三重奏禮盒」,唔好蝕畀商場呀。

情人節(2月14日)2pm會有陳敏之做嘉賓。
情人節(2月14日)2pm會有陳敏之做嘉賓。

「瓷」名中西樂茶園
日期:即日起至2016年2月22日
地點:馬鞍山新港城中心L2天幕廣場 (港鐵馬鞍山站)(顯示地圖

九:陪長輩睇跳花影舞

老一輩嘅朋友,相信都會較為喜愛藝術感較高、相對較為文靜嘅活動,喺北區嘅朋友可以睇下上水廣場嘅「花影‧舞動藝裳展」,日本踊繪藝術大師神田沙織舉行香港首個個人展覽,設計出全港首個以「春花」為主題的5米高巨型和服造型裝置藝術品,圖案洋溢富貴豐盛的櫻花。此外,展覽超過15件糅合視覺及肢體創意藝術、艷麗多彩及巧手細膩之藝術珍品,包括多幅別具個人風格色調之繪畫作品,分別為「弁財天」、「咲咲樂」、「翔翔夢」、「嬉嬉樂」、「春待」、「夏待」等畫作、別緻的和服及日式展品,

上水 02
圖片:官方相片
上水 01
圖片:官方相片

Landmark North上水廣場 x 神田沙織「花影‧舞動藝裳展」

日期:1月24日至2月29日,上午10時至下午10時
地點:上水廣場2樓中庭

其實有節目又好,冇節目又好,新一年都係想開開心心,一團和氣。見到初一至初三都仲開工嘅朋友,就講句新年快樂,辛苦晒吧。人人放假自己冇得放假好慘㗎‥‥‥雖然佢哋可能係double paid。

延伸閱讀:

呃like打卡必到!中環、油麻地31條超靚樓梯畫

2個轆踩入林村 「運桔」行程攻略 |新年遊懶人包|
新假期周刊 電子書:
ios:https://itunes.apple.com/hk/app/xin-jia-qi-zhou-kan/id722179449?mt=8

Android:https://play.google.com/store/apps/details?id=com.weekendhk.newsstand2&hl=zh_HK
新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」,搞掂!