想知男友啱唔啱做老公?去次旅行啦!@小盛女

博客

廣告

「最衰都係你!我都話問路㗎啦,你又話要睇地圖,行埋晒啲冤枉路,攰死我喇!」嚴重公主病的Brenda邊走邊說,男友Mike沒有反駁,只是默默地看著地圖,堅信自己可以帶女友到台北著名的燒肉店「大碗」吃一頓豐富午餐。在台北鬧市中左轉右轉,跑上跑落,終於來到「大碗」店前,遠看店裡漆黑一片,Mike已經心知不妙。「乜話?五點先開?你又話問過會開!點做research㗎你?無鬼用!」又餓又累的Brenda像一隻怒火中燒的恐龍,邊走邊噴火,「我係問過,佢話1月1號都會開門,但無問幾點開,對唔住呀。」Mike內疚地說,同時心裡暗罵自己為何這麼笨,令女友失望。

這次是Mike和Brenda的第一次旅行,四日三夜台北自由行,Brenda說對行程沒甚麼要求,所以大部分行程都是由Mike負責計劃,他有數個台灣朋友,難得來台灣當然要見見面,吹吹水,於是其中一個行程安排了與台灣朋友們七點半在台北101見面。台北是個購物天堂,Brenda一直逛一直買,完全忘了看時間,Mike一向準時,也不好意思要朋友等,於是多番提醒女友,可是購物中的女人通常都失去理性,「行多陣啦」、「好快好快」,最後他們遲了一個小時,除了一直說抱歉之外,Mike也不知如何是好。

 
一整天密密麻麻的行程過後,他們終於回到酒店休息。
「今日由朝玩到晚,好攰呀,瞓覺喇,早唞。」Brenda說。
「我哋好似有嘢未做喎BB。」Mike說。
「咁夜唔做喇,瞓啦,聽日仲要早起身。」Brenda已閉上眼準備睡覺。
「好啦,尊重你,早唞。」Mike親了Brenda面頰一下便睡了。
「呼……呼……」不用十秒Mike已經熟睡,Brenda卻因鼻鼾聲太吵而輾轉反側。
Brenda昨晚醒了六、七次,每次醒來都是聽到「呼……呼……」的鼻鼾聲,睡不夠,當然非常燥底,所以一早起來便對Mike咆哮:「你成晚打鼻鼾搞到我瞓唔到呀!第時我哋分房瞓啦!」Mike感到不好意思,並說:「你拍醒我嘛女朋友,慘喇搞到你無覺好瞓,對唔住呀。」Mike又再次向她道歉,並說要帶她到西門町血拼,希望她不要再生氣,然後整個台灣四天團就在Brenda的咆哮聲及Mike的道歉聲中「圓滿結束」。

「喂?Brenda?咩事啊?」朋友Crystal說。
「之前你咪叫我同男友去旅行試下佢點嘅,原來佢容忍量勁大,又溫柔又細心,我諗佢會係個好老公,嫁得過呀!」Brenda興奮地說。
「恭喜你呀,快啲mark實佢啦咁!」朋友Crystal說。
「喂?Mike?咩事啊?」朋友Ricky說。
「之前你咪叫我同女友去旅行試下佢點嘅,原來佢公主病勁嚴重,成日亂發脾氣,我諗佢唔會係個好老婆,娶唔過呀!」Mike擔心地說。
「撞鬼囉!咁你拿拿臨搵過第二個啦!」朋友Ricky說。
一直忘了說,題目其實可改成「想知女友啱唔啱做老婆,去旅行吧!」,當你一直在評估另一半是否適合做終生伴侶的時候,其實對方很可能也在評估你,兩個人性格不同,生活習慣不一樣,相處時一定會有不配合的地方,需要長時間磨合、遷就和調節,相愛很簡單,要維繫卻不易,如果遇到好對象卻不懂珍惜的話,幸福也是會偷偷溜走的,共勉之。