【自助餐放蛇起底組】 和民 ~尖咀分店搞放題!! 蟹腳+刺身+滑蛋鍋任食 記者嬲爆實測
撰文、攝影：放蛇組
和民 放題：長腳蟹多肉鹹鮮
落單以劃紙仔形式，有壽司、刺身、燒物、揚物、鍋物和飯麵等，有平時單點的7成，選擇都幾豐富。刺身雖然不是超級新鮮，但起碼沒有雪味，章魚不夠彈牙，最可取是赤蝦，夠大隻。刺身雖然一般，但可轉移目標食長腳蟹！大大隻，肉多又夠鹹鮮，而且拆肉工具和剪刀亦一早放在枱面，好方便。壽司本想叫軟殼蟹卷，但來了一件只得飯的壽司卷，軟殼蟹只得一小小小粒，原來是廚師＂眼大睇過龍＂，反映後店員亦非常有禮和迅速補上一件卷著軟殼蟹、青瓜和沙律醬，ok啦。
劃紙仔落單，選擇有平日的7成。
想什麼都吃的可以選刺身7色拼盤，有三文魚、赤蝦、帶子和章魚等。
長腳蟹多肉，又夠鹹鮮，不錯！
軟殼蟹卷第一次來的時候只有一丁點蟹腳仔（上圖），和店員反映後亦很快換過另一碟完整飽滿的（下圖），好有禮貌！
和牛、燒羊鞍、炆牛脷必食 迷你牛肉壽喜燒、天婦羅出菜慢
另外亦有各款燒物任食，和牛雖然賣相不太討好，但食落牛味濃、油脂亦足，記住趁熱食；秘製炆煮牛舌亦不錯，入口軟嫩，湯汁亦好飲；燒羊鞍肉厚得離譜！羊味夠出而且肉質好有彈性，不得了！其他鍋物例如滑蛋豬柳鍋、牛油燒帶子是以迷你size上枱；牛肉壽喜燒和天婦羅出菜好慢，等了約50分鐘才到，牛肉壽喜燒有4大片牛肉，湯底亦充滿蔬菜甜味；天婦羅上枱時沒有附上蘸醬，炸漿亦上得不平均、蝦無蝦味，可以不吃。
另外芝士控必食的芝士年糕，拉絲力好強，好啱相機先食，質感夠煙韌軟綿，不過吃多幾口會很膩，記住share。另外亦有拉麵、烏冬和鐵板炒麵等熱食。
和牛樣子很頹，但食落其實有驚喜。
秘製炆煮牛舌非常軟嫩，回味。
燒羊鞍肉厚有彈性，必食！
滑蛋豬柳鍋和牛油燒帶子都ok，蛋滑，豬柳又有蛋香；燒帶子的牛油重味點會更好。
牛肉壽喜燒等足差不多一小時才到，有4大片牛肉、湯亦夠甜。
天婦羅盛盒炸漿上得不平均，可以skip。
芝士年糕拉絲力強，食落亦夠煙韌軟綿。
另外亦有拉麵、烏冬和鐵板炒麵等熱食。
豚平燒、廣島燒餅等1小時45分鐘
食了近1小時45分鐘（期間記者催過1次），店員才送上廣島燒餅和豚平燒，要等超級耐！雖然都是迷你size，但都已經接近食飽了，想order這兩個的話要向店員加緊催單！
都是迷你size，但等了接近兩小時才到。
廣島燒餅包著滿滿的蔬菜和適量豬肉。
豚平燒蛋片散亂，包得不完整。
記者坐的這一枱近店員落單的櫃枱，電話不停響不停響亦無人接聽，簡直嘈到就發癲，連一向冷靜沉著的記者亦忍不住在鏡頭面前不小心地爆了粗（詳見短片），奉勸大家如果之後來吃的千萬不要坐這個位，亦奉勸各位想訂枱的讀者晚上都不要浪費力氣打電話，因為是沒有人手接聽的。
自助區汽水啤酒任飲 Häagen-Dazs任食
餐廳還有自助區，有飲品、甜品和生果等可自己拎，飲品有汽水和啤酒等罐裝飲品；甜品則有件裝芝士蛋糕、布甸等，最吸引的是有幾款Häagen-Dazs雪糕任食！回本要食多幾盒！
總結：雖然選擇方面好豐富，有平時單點的7成，但味道不過不失，有小失手。店員雖然好有禮貌，但人手亦不足，出單和執碟好慢，亦有double出單的情況，建議想食的在開頭一次過落單，否則邊食邊落真的有排等。價錢方面平日晚市$288可以任食2小時，雖然夠鐘後無人趕我們離座，但加一後都要約$320，假期的話便更貴…
一句到尾：散叫好似抵食啲！
香港居食屋「和民」
地址：尖沙咀誠信大廈2樓（顯示地圖）
電話：2312 2455
晚市放題供應時間：6pm-11:30pm
收費：
星期一至四：成人:$288、小童:$168
星期五至日：成人:$308、小童:$168
用餐時間：2小時
備註：收加一
延伸閱讀：
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
