中秋 去邊好?5大賞月市集!歎限定紫薯芝心豬扒漢堡

香港好去處

廣告

中秋 就快到!連埋有成3日假咁多,一於玩盡佢!我哋特登準備咗5大特色市集俾大家跟住玩!有啲玩潮流,可以歎住人氣邪惡紫薯漢堡同芝士熱狗賞月;有啲玩浪漫,可以望住高過一個人嘅充氣月亮,零距離賞月;有啲玩懷舊,重現經典廟會夜,食買少見少嘅潮州冷糕同炭燒雞蛋仔!大家ready好去大玩特玩未?

捷徑:淺水灣The Pulse市集(本頁)/ 理工大學廟會 / 中環PMQ / 荔枝角清新市集 / 科學園MAMASMART

中秋限定!邪惡紫薯芝心豬扒漢堡!市集有得食

提供本地創作平台嘅HITCHHIKE,嚟緊一連三日喺淺水灣The Pulse攪市集暨音樂節,地下有嘢食,天台有歌聽。嘢食方面,好多坊間邪惡美食都有得食,包括Eighty Sense 中秋期間限定嘅紫薯芝心豬扒漢堡,芝心豬扒已經夠邪惡,仲要加埋紫薯蓉,連個包都係紫色添,match晒!另外亦有超邪惡ICONIC H 熱溶芝士熱狗,雖然漢堡加熱狗都同 中秋 完全講唔埋,但美食當前,大家都無謂諗咁多喇!

飲品方面就有專喺市集擺檔嘅LED Mocktail,燈泡型樽身內有水晶凍,經燈光或陽光照射下呈現漸變色,呃like一流!

成個月亮食落肚!應節明月大菜糕

話晒都 中秋 ,市集入面都會有應節食品俾大家揀嘅!好似下圖呢款由ig shop Telight製作嘅明月大菜糕,用蛋花大菜糕扮月亮,俾大家食月亮落肚,而且現場每日限量100個!店方亦會製作綠茶紅豆雞蛋仔,綠茶味雞蛋仔內有粒粒紅豆,上佢哋ig見到呢款雞蛋仔好易sold out,嘩!唔係又要排長龍先食得吖嘛?!

唔食得嘅月餅⋯⋯頸鏈

場內除食物攤位之外,仲有手作市集!其中製作單位小雜團主打手作設計,當日會推出月餅頸鏈同楊桃頸鏈,鬼馬之餘亦夠晒應節!佢哋喺製作月餅頸鏈時仲曾經焗燶個「月餅」,下次真係要好好控制火候喇!

陳奐仁、Supper Moment陪賞月

話明係市集暨音樂節,當然唔少得音樂表演啦!喺為期3日嘅音樂節入面,表演單位有陳奐仁、Supper Moment 、陳蕾、李拾壹、新青年理髮廳、小紅帽同DJ JFung Remix 等,分別由每日由下午1點唱到夜晚9點,想捕獲佢哋就要睇實時間表喇!

3米高充氣月亮 賞月零距離!

值得留意係天台音樂節位置有一個3米高充氣月亮燈,可以零距離賞月,不過想睇就要俾錢喇!因為要入天台音樂節就要收費,以一日成人票價錢計,現場買要$150,預售價就收$120,可以上網買又或者去HMV門店買,想慳錢就要留意啦!

HITCHHIKE市集暨香港中秋音樂節
日期:2015年9月26至28日
時間:1pm-10pm
地點:淺水灣海灘道28號 The Pulse 灘畔商場;市集於L3及音樂節在天台 (顯示地圖
備註:市集免費入場;音樂節需付費
音樂節門票費用:現場門票:成人$150 一日、$380 三日;學生$120 一日、$300 三日
預售門票:成人$120 一日、$300 三日;學生$100 一日、$250 三日
預售門票網頁:http://www.ticketflap.com/zh/fullmoonfestival

Facebook Page:https://www.facebook.com/hitchhike852

理大廟會夜!重現昔日情懷!只限一晚

成日講舊陣時,係!舊陣時真係好多好嘢,依家已經愈嚟愈少見!不過呢個迎月夜,將潮洲冷糕、炭燒雞蛋仔、皮影戲全部帶返晒嚟!皆因理工大學9月25日將會舉行廟會市集,大玩懷舊趁墟主題,有小食亦有手藝工作坊,重現香港昔日情懷,不過就只限一晚,美好嘅回憶通常都好短暫嘅⋯⋯

懷舊風味再現!油麻地潮洲冷糕+牛下炭燒雞蛋仔

廟會內有多種懷舊小食可以俾大家睇住點整,包括年輕一輩(包括記者)都未必太熟悉潮洲冷糕,冷糕大約係六、 七十後嘅街頭小食,餡料係是砂糖、 芝麻和花生碎,食落外脆内軟,滲有糖香。而炭燒雞蛋仔亦係買少見少,牛頭角下邨嘅木頭車炭燒雞蛋仔深受街坊歡迎,可惜牛下清拆後,都無乜機會食到,依家檔主重出江湖,大家又有得食返充滿炭香嘅雞蛋仔喇!另外亦有上水小店物盡其用,製作豆腐渣酥,以及新界古法由糯米粉同花生餡製成嘅茶粿,大家又有口福喇!

懷舊工作坊 學返門手藝

除咗懷舊小食,廟會內亦有民間傳統工藝工作坊,包括以嫦娥奔月為題,製作皮影戲,亦有紙紮地燈製作、以及圖章飾物雕刻,免費參與,不過要報名就趁早,聽講名額都差唔多滿,想去就要去官網check下喇!

迎迎月・大派對
日期:2015年9月25日
時間:5:30pm-10pm
地點:香港理工大學賽馬會創新樓平台(戶外位置) (顯示地圖
費用:免費入場,但需預先網上報名
報名網頁:http://www.10dayfest.hk

中秋照呃like PMQ Smiley巨型花燈

今個中秋撞正星期日,有假放,但呃like呢個任務從來唔會放假!為咗應節,中環PMQ低層地下平台花園放咗多個高達一至兩米嘅Smiley樣巨型花燈,每個都有唔同嘅鬼馬樣,俾你行埋去同佢哋selfie,呃like無難度,而且依家已經有得影,去到9月29日先完。嫌淨係影相會悶親隔離,可以揀9月25日至28日去,有個小型市集,有彩繪布袋及印度指甲花Henna彩繪等攤檔,規模雖比較小,但都屬心機之作,手作愛好者都不妨望望。

GP x Smiley®開心能亮週末夜間藝術市集
日期:2015年9月25至28日
時間:6pm-10pm
地點:中環鴨巴甸街35號PMQ Marketplace & Courtyard
費用:免費入場
網頁:www.pmq.org.hk

荔枝角小清新市集

市集熱點荔枝角D2喺中秋期間有活動!大會將會連同Noah Market 合作,舉行市集,佔地2層連天台,參展檔位超過160個,都係雲集美食及手作檔位。飲食檔位包括有走小清新路線嘅好時光,當日會推出鮮芒果冰棒同檸檬梳打;亦有中西合壁嘅黑皮麥斯,以中式茶混合不同嘅花茶、果茶,變成mocktail。而手作檔位有勁少女風嘅Sharoasis.handmade,當日會以兔子為題推出飾物,亦有羊毛氈手作人Tammytam95製作嘅小動物擺設,到時可以食下嘢再慢慢行。而主辦單位亦預告將會於天台放有2米高嘅吹氣月亮燈,俾大家影相呃like應節。

Noah Market x D2 Place中秋派對
日期:2015年9月26至28日
時間:1pm-11pm
地點:荔枝角長義街9號D2 Place一期2/F、9/F及天台花園(顯示地圖
費用:免費入場
Facebook Page:https://www.facebook.com/HK.Noahmarket

科學園整燈籠應節

定期每月最後一個星期日下午舉行嘅MAMASMART,一直都主打親子活動同手作市集、而中秋節都唔例外,當日現場有手工花燈工作坊,爸爸媽媽可以同小朋友一齊整中秋花燈,整完可以即晚玩,台上亦有音樂表演,新環節MAMASHOW內,小朋友更有機會上台演出,挑戰膽量。另有二手換物活動MAMASWAP,整個換物過程會係用積分制,將二手物件帶去,換取積分,就可以用所得積分交換其他二手物件,都幾環保!

MAMASMART
地址:沙田香港科學園2期尚湖樓地下(顯示地圖
時間:12nn-6pm
費用:免費入場,燈籠班另外收費
燈籠班費用:每位$100 (一個大燈籠)/$160(包括一個大加一個小燈籠)

延伸閱讀
歐洲家品大哥 Habitat 襲港!精選十大必買家品!
LEGO積木包 紫薯抹茶玫瑰味
新假期周刊 電子書:
ios:https://itunes.apple.com/hk/app/xin-jia-qi-zhou-kan/id722179449?mt=8
Android:https://play.google.com/store/apps/details?id=com.weekendhk.newsstand2&hl=zh_HK

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」,搞掂!