【自助餐放蛇臥底組】$400有找 高級和牛火鍋 放題

飲食

廣告

本身只有燒肉 放題 嘅盛八,最近開埋火鍋 放題 ,主打日本A4級飛驒和牛,埋單一個人$400有找,係咪真係咁正?即睇試食報告!

記者前後總共食咗三盤飛驒和牛,並唔係因為好食到要食三盤,而係想知係咪每盤嘅質素都係一樣!

 

第一盤飛驒和牛賣相唔錯,脂肪紋細緻且密,肉質幾滑,有少少入口即溶的感覺。

第二盤飛驒和牛個樣同第一盤有啲出入喎,肥過第一盤,有少少筋。

 

第三盤飛驒和牛比之前嗰碟更多肥膏,差咗D喎……

總結嚟講,飛驒和牛雖然較肥,不過味道同口感都係合格嘅,唔似一般打邊爐肥牛咁韌!

環境舒適 似自助餐

喺旺角新開嘅Deli Square有三層,可能因為唔係幾易揾嘅關係,呢到平日晚飯時間都冇爆場。餐廳嘅設計寬敞,枱與枱之間有一定的空間,讚!亦都有啲似自修室嘅位,幾得意。

呢到除咗肉類之外,其他火鍋材料都係以自助餐形式擺放,所有食材分門別類,環境企理乾淨,讚!最令我驚喜係有熱情果汁,好甜好好味!忍唔住要飲多幾杯。除咗火鍋之外仲有個刺身bar,每人每次限攞四塊,有效打擊大嘥鬼!刺身有三文魚、章魚、玉子、劍魚等。

三文魚刺身超厚切!新鮮肥美,夠晒彈牙,勁香三文魚味!一定要添食再添食!

除咗公仔麵、烏冬,打邊爐都可以試下粉紅色嘅柚子麵同綠色嘅綠茶麵。柚子麵聞落似香精,係冇柚子味嘅;綠茶麵同柚子麵一樣,聞落係冇綠茶味嘅,食落兩隻麵其實同普通拉麵係冇!分!別!

喺甜品隔離有兩個電飯煲,分別載有白飯同日式紅酒燴和牛。打邊爐食到咁上下,整返碗咖喱和牛飯都唔錯。聞落咖喱味好香,食落反而冇咩咖喱味,只有辣味,和牛粒夠腍,撈飯食其實都OK!由於佢呢到限時90分鐘,打邊爐食唔飽的話,可以考慮食返碗咖喱和牛飯。

記者攞嘢打邊爐時行過見到勁多甜品,已經留定肚。超過十款甜品,加埋綠茶噴泉,真係冇得輸,唔知味道係點呢?

 

朱古力蛋糕同朱古力泡芙係必食!朱古力味超香超濃,食落又唔漏,唔覺唔覺又食咗幾件。綠茶噴泉嘅綠茶味夠香,又夠甜,有得玩又有得食,小朋友一定中意。雖然好多甜品都好味,但都有伏嘅!呢到嘅mousse都係似藥水味。呢個有綿花糖喺入面嘅甜品,口感好奇怪,又酸,食到忍唔住吐出嚟。

總分:7.5/10

環境舒適,而且食物選擇夠多,如果揀最貴價錢嘅套餐可以任食全部嘅肉,包括飛驒和牛、貴族和牛、牛肩肉、雞肉、嚴選豚肉等。出面百幾蚊先得100g飛驒和牛,所以呢到任食飛驒和牛係超抵!唯一唔好係限時90分鐘,其實真係唔係好夠時間,食得有啲急,如果可以慢慢食就好喇。

 

 

盛八日式火鍋放題店

地址:旺角通菜街1A-J號威達Deli 2商業大廈3樓B室(顯示地圖

晚市價錢:$178-$378 (入座起計90分鐘)

 

延伸閲讀:

30000呎人氣酒場 自家風乾牛 + 手工啤酒 【鰂魚涌】

歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按扭下揀選「搶先看」,搞掂!

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..