自助餐+花海打卡+蠟筆小新展覽｜食足5餐！ 澳門2日1夜行程 聖誕跨年懶人包
text: Ellissa | photo: Fion, 有關機構
【DAY 1】01 ｜美式聖誕早餐：Dean & DeLuca Cafe
澳門銀河新開嘅Dean & DeLuca Cafe，來自紐約，新開不久就已經吸引唔少人到場幫襯，搭早船來到澳門可以先到這裡吃一個豐富又有紐約特色的聖誕早餐。
D&D的食物融合了美國同澳門嘅飲食文化，例如用非洲雞做炸球，聖誕將至，更加推出聖誕特色食品，加添節日氣氛。
除咗聖誕特色新品，D&D仲有好多特色必吃甜品，彩虹蛋糕係其中之一。經理話每間分店嘅彩虹蛋糕口味，都會因應地區需要稍作改良，所以味道同質感都會唔一樣。
鹹蛋西瓜沙律就更加係澳門嘅特色，聽到個名可能覺得奇怪！記者訪問經理，佢話有人食西瓜喜歡加鹽調味，於是創新加入鹹蛋和泰式醬汁配製成沙律。記者親身試味，以為一定會中伏，結果出奇意外地夾！
Dean & Deluca Cafe
地址：澳門銀河地下G107
電話：+853 8883 2221
營業時間：8am-9pm
02｜威尼斯人 免費print出Swarovski紅框相
威尼斯人聖馬可廣場裡面，有一棵12米高的Swarovski水晶聖誕樹，重點係佢左邊有一部紅色曬相機，只要scan QR code同喺微信上選擇活動，就可以上傳手機照片，免費打印出來！記者即場試玩，張相會有紅色邊框，聖誕氣氛濃厚！
Swarovski免費曬相機
地點：威尼斯人聖馬可廣場
費用：免費
03｜打卡必去！夢幻少女粉色tone 聖誕下午茶
澳門銀河嘅Cha Bei，去年開幕後一直一位難求，Cha Bei就是茶杯的意思，每一個特色設計的茶杯，背後裝有你和閨蜜的故事。整間餐廳環境設計都走少女粉色系列，仲有唔少打卡位。
不得不提全新下午茶系列「繽紛狂想曲」，份量超級豐富！二人份包括精緻三文治及鹹點、花漾甜點、柚子梳芙厘配雲呢嗱醬，配上茗茶、熱朱古力或者咖啡，成個set大到兩個人根本食唔晒！雖然主力係甜品，但鹹點一樣好好食，特別係松露蘑菇酥，外皮鬆脆，餡料豐富。
聖誕期間這套下午茶嘅蛋糕甜點，更會裝飾成雪人同戴上聖誕帽，只在聖誕期間限定，由於呢set甜品製作需時，每日只會限定發售8套，如果想食就要預訂喇！
Cha Bei
地址：澳門銀河1樓1047舖
電話：+853 8883 2221
營業時間：午餐12nn-3pm，下午茶3-6pm，晚餐6-9pm(星期一至四), 6-10pm(星期五至日)
04｜免費同聖誕老人影相
食飽飽最啱周圍行下、影下相，可以選擇去搵真正嘅聖誕老人。超過50年表演經驗嘅Santa Ron專程由北歐飛嚟澳門同大家過聖誕，即日起到26號都可以搵佢影相，唔使去芬蘭都見到真聖誕老人！
與聖誕老人親密接觸
地點：澳門銀河東翼廣場
日期：2017年12月1-26日
時間：1-4pm, 5:30-8:30pm
05｜光影節有驚喜 白玫瑰花海
今年澳門光影節最矚目嘅景點，應該係位於南灣湖水上活動中心嘅白玫瑰花海。呢片花海約有半個足球場大小，每晚 7-10pm 亮燈，著燈之後真係好靚！記者到現場拍攝嗰日都見到人山人海，唔少情侶同一家大細到場留倩影。
除咗打卡景點之外，佢實質是一個迷宮！記者兜咗入去拍攝，本身想沿路行翻出去，結果係失敗唔可以嘅！所以如果會到場影相，記得要行多幾步行晒全程。
白色玫瑰花海隔籬仲有一個彩色版本，同樣吸引唔少人拎埋腳架嚟影相！不過彩色玫瑰花就比起白色玫瑰花矮，所以相對吸引更多小朋友跑嚟跑去，各位如果想影靚相就要等一等。
06｜互動光影遊戲 畫畫登上銀幕
呢期澳門舉辦緊teamLab展覽，其中一個活動可以即場畫畫，scan入電腦，然後在銀幕上可以互動。南灣湖白玫瑰花海旁邊的廣場，同樣可以玩！此為光影節免費體驗，首先畫上自己喜歡嘅圖案，交畀工作人員 scan 一下，幾秒之後抬頭望吓上面帳幕，就可以見到了！
澳門2017光影節 花海迷宮
地址：南灣湖水上活動中心
開放日期：2017年12月3至31日
亮燈時間：7-10pm
07｜平食節日自助餐 怒食葡、泰、中式美食
玩完全日最啱食大餐，自助餐就最好不過。金沙城Sheraton的節目自助餐比香港酒店的相對抵食，聖誕同除夕都係5百幾蚊左右，有各式各樣澳門菜、葡國菜、泰國菜及中菜，大家可以一次過食勻4國風味。現場有廚師即席烹調菜式，又有新鮮至尊海鮮凍盤。聖誕期間，餐廳仲提供特色聖誕蛋糕、布甸，同多款口味的聖誕拐杖糖。
盛宴多國風味自助餐
地點：喜來登金沙城中心大酒店
費用：聖誕自助晚餐(12月4-25日 MOP588+)，除夕自助晚餐 (12月31日 MOP538+)
聯絡電話：+853 2880 2000
網址：www.sheratongrandmacao.com/zh
DAY 1 氹仔兩大住宿推介
全日都在氹仔活動，酒店揀返氹仔就最方便行程，住澳門銀河的話推介JW萬豪酒店，上網查過12月房價由MOP1,180起，抵住喎！酒店去唔同景點都方便，仲有24小時行李寄存同自助退房手續，啱晒想第二日玩全日又唔想拎行李嘅客人。
澳門銀河
網址：www.galaxymacau.com/zh-hant/
羅斯福酒店係今年6月新開嘅酒店，房間有落地玻璃，可以俯瞰氹仔馬場。超過368間客房，每一間房都有特別景觀，包括河景、賽馬會觀景等。12月同1月最抵房價只係MOP1,093起！
呢個房型可以見到氹仔馬場同附近樓景，落地玻璃可以畀太陽光照進。
羅斯福酒店
網址：themacauroosevelt.com/zh-hant/
【DAY 2】搭𨋢上山晨運 看路氹全景
第二日瞓醒喺酒店食埋早餐，可以選擇上山郊遊，以為一定要行得好辛苦？事實係可以搭新開嘅斜行電梯，上大潭山觀景台，仲可以一覽路氹全景。
大潭山自來水廠瞭望台
斜行電梯開放時間：7am-6pm
08｜意式午餐 正宗意大利菜
睇完靚景可以去食新葡京入面就開嘅意大利菜「當奧豐素」 ，由越洋過海嘅意大利主廚主理，仲會親手炮製，pizza舖滿了手壓San Marzano蕃茄、新鮮牛奶芝士、水牛芝士、手工辣肉腸，口味非常正宗。
當奧豐素1890意式料理
地址：澳門葡京路新葡京酒店三樓
電話：+853 8803 7722
營業時間：12nn-2:30pm,6:30pm-10:30pm
網址：www.grandlisboahotels.com/en/grandlisboa/dining/casa-don-alfonso
09｜蠟筆小新大冒險展覽 移師澳門
早前台灣蠟筆小新展引起唔少人關注，今個聖誕可以考慮去澳門睇。展覽12月16日開始，展覽中有晒卡通入面多個角色嘅場景，當中仲有兩個澳門區特別展覽，結合澳門元素，小新的大象會變成澳門旅遊塔嗎？
蠟筆小新特展春日部大冒險
日期：2017年12月16日至2018年2月14日
時間：2-9pm（最後入場時間為8:30pm）
地點：百老匯展覽廳二樓2樓
聯絡電話：+853 6288 9485
10｜日式Cafe 怒食芭菲班戟
睇完小新展，落去食埋Ufufu cafe的甜品先打道回港吧！花多眼亂的餐牌上面真係令人有選擇困難，記者試食兩款招牌甜品，TIRAMISU芭菲同梳芙厘班戟係兩款適合港人口味的甜品，第一款芭菲裡面有多款味道，加上鮮甜的士多啤梨，見到都想食！班戟配抹茶雪糕同紅豆蓉，唔會太甜，食落啱啱好。記得Ufufu的甜品係落單後立刻炮製，等候需時，所以預多一點時間歎甜品，唔好趕住船去啊。
Ufufu Cafe 佐賀橫町
地址：百老匯美食街H-G006-G011號舖
電話：+853 2899 1106
營業時間：12nn-11pm
延伸閱讀：開幕直擊！澳門teamLab展覽 5大打卡熱點＋購票攻略
