野餐
野餐

【周末攻略】 6大市區野餐好去處

香港好去處

廣告

秋風起,最啱就係約埋一大班朋友去野餐㗎喇!唔想又搭車又搭船先去到野餐地點?我哋編輯部今次就特登搵咗6個市區野餐好去處,等大家可以嘅方便又快捷咁野餐!

1. 佐敦谷公園

好難想像喺香港嘅市中心會有咁大片草地,不過近年已經越嚟越多人識得去佐敦谷公園,假日更加逼滿咗一個個家庭,唔少父母都會帶小朋友嚟呢個草地跑跑跳跳。雖然人多咗,但係交通方便,唔少巴士都途經附近,由彩虹坐的士到佐敦谷公園,更幾乎唔駛跳錶,所以呢度依舊係記者最愛野餐地點!

周末推介 野餐 佐敦谷

除咗一般公園設施,呢度仲有遙控模型賽車場
除咗一般公園設施,呢度仲有遙控模型賽車場

環境:★★★★☆ 公園佔地約6.3公頃,而且草地面積亦大,不過假日就略嫌人多。

交通:★★★★☆ 位於東九龍中心位置,有多架巴士及小巴途經佐敦谷公園,不過搭港鐵就要再轉車喇。

洗手間:★★★★★ 公園內設有4個洗手間,無論身處咩位置,梗有一知喺左近。

其他設施:★★★★★ 除咗遙控模型賽車場,仲有緩跑徑、社區園圃等等,仲有水機可以隨時refill飲用水!

佐敦谷公園

地址:觀塘新清水灣道71號(顯示地圖
電話:2342 2241
開放時間:5am-11pm;遙控模型車場9am-10:30pm;園藝教育中心9am-6pm;社區園圃8am-6pm

 

2. 西九海濱長廊

位於海邊嘅西九海濱長廊,最大嘅賣點就係無敵大海景,吹住海風咁野餐都咪話唔爽!呢度仲不時會舉辦唔同活動,好似一月一度嘅自由約,就係喺西九文化區苗圃公園舉行。

周末推介 野餐 西九海濱長廊

不過西九海濱長廊就真係夠晒長,由入口行去草地都有D距離,所以有唔少人都會選擇喺西九入面以單車代步。

周末推介 野餐 西九海濱長廊

環境:★★★★★ 無敵大海景,而且佔地極大,寧靜舒適。

交通:★★★☆☆ 雖然喺九龍港鐵站附近,不過由港鐵站行到去草地都需要15分鐘。

洗手間:★☆☆☆☆ 只有出入口附近先有洗手間,平時舉辦活動都要靠流動洗手間幫手分散人流,而且地方太大,行去洗手間都可能要10分鐘。

其他設施:★★★★☆ 雖然有得租借單車,不過要$20一個鐘,略嫌有d貴。不過西九歡迎大家帶埋寵物一齊野餐,係少開放畀寵物嘅大面積公園。

西九海濱長廊

地址:尖沙咀柯士甸道西與雅翔道交界(顯示地圖
電話:2200 0217
開放時間:6am-11pm

3. 零碳天地

相信好多人都留意到,喺九龍灣Megabox對面,有個靚靚公園,原來呢度都可以野餐!一行入零碳天地,就見到大片草地,草地對出就係馬路同大型商場,呢度絕對稱得上係鬧市中嘅綠州!

周末推介 野餐 零碳天地

話到明係零碳天地,呢度採用咗好多綠色建築方式,好似室內採光技術同埋天台嘅太陽能光伏板等等,用嘅全部都係可再生能源。呢度仲有室內展覽室,等公眾可以了解更多低碳生活。

呢個巨型吊扇就係其中一個展品

環境:★★★☆☆ 地方較細,不過勝在人少。

交通:★★★★☆ 喺正Megabox對面,搭商場接駁巴士就去到。

洗手間:★★★☆☆ 洗手間設於出入口附近,採用環保設計,值得一讚。

其他設施:★★★★☆ 成個零碳天地都充滿住環保訊息,最啱爸爸媽媽帶埋小朋友嚟,邊學邊玩。

零碳天地

地址:九龍灣常悅道 8 號(顯示地圖
開放時間:7am-8pm

4. 添馬公園

相信香港人對於政府總部附近嘅添馬公園都唔會陌生,呢度除咗可以集會之外,當然都可以野餐啦。

周末推介 野餐 添馬公園

環境:★★★★☆ 無敵大海景,佔地大,唯一唔好就係太近政總。

交通:★★★★★ 喺金鐘港鐵站一出,過條天橋就到!

洗手間:★★★★★ 設有兩個洗手間,而且呢度嘅洗手間出名乾淨。

其他設施:★☆☆☆☆ 冇乜特別設施,主要就係一片草地。

添馬公園

地址:金鐘夏慤道(顯示地圖
電話:2520 2321
開放時間:24小時開放

5. 山頂公園

顧名思義,山頂公園位於山頂纜車站後面,係百年前港督別墅嘅「後花園」,景色優美,而且仲可以帶埋狗狗去,有一大片草地可以跑跑跳跳!

周末推介 野餐 山頂公園

環境:★★★★★ 位於山頂,景色優美。

交通:★★☆☆☆ 只可以搭巴士同纜車上山,而且要再行一段路先到。

洗手間:★☆☆☆☆ 只有一個洗手間,不過好彩地方唔算太大。

其他設施:★★★★☆ 話晒係前港督別墅嘅「後花園」,好多懷舊英式建築,而且仲有唔少行山路線都途經呢度,可以野餐之餘,順便行埋山。

山頂公園

地址:太平山柯士甸山道(顯示地圖
開放時間:24小時開放

6. 中山紀念公園

中山紀念公園位於海邊,呢度唔止係公園咁簡單,附近亦有足球場、籃球場同體育館,夠晒多元化。

周末推介 野餐 中山紀念公園

環境:★★★☆☆ 位於海邊,飽覽海景,不過草地範圍唔大,一眼睇晒。

交通:★★★★☆ 位於上環港鐵站附近,步行大約10分鐵,亦有多架巴士途經。

洗手間:★★☆☆☆ 只有一個洗手間,不過都算喺草地附近。

其他設施:★★★★☆ 又有籃球場,又有足球場,野餐之餘都可以運動吓。

中山紀念公園

地址:香港西營盤東邊街北(顯示地圖
電話:25409704
開放時間:24小時開放

延伸閱讀
周末推介 5大文青好去處
【周末遊懶人包】荃灣生活百貨精華遊 兩大日店首次進駐香港